（感謝fefe 提供的錄音！我很贊同講者的觀點。下面是我邊聽邊打出來的，我粵語不太好，可能有個別錯誤，歡迎指正。）以下是芝See菇BI（卓韻芝）于5.19，903五日精華游中說的一段話：

 

 

兩日前，接受咗几位中學生嘅訪問。

佢哋問到我，對四川地震有冇想講嘅嘢。

冇。對于天災，我冇任何嘢想講。

佢哋應當好失望，因為訪問之中，無論係幾敏感嘅問題，我都樂意回答。

而佢哋睇嚟，好想知道我對于呢一個問題嘅答案。

我當然好明白，佢哋唔係凈想我好X咗大家捐款吶。

我再次話：冇，我真係冇任何嘢想講。

我哋間唔中用『不幸』呢一個詞語，追唔到巴士啦、

去PARTY同人撞衫、揾唔到工呀、遇上壞情人、遇上交通意外、疾病，

我哋都會話：真係『唔好彩』！

 

天災，應該係人類點樣面對『唔好彩』嘅最大考驗。

冇任何人做錯事，冇任何人可以怨，你可以怪邊個嘞？！

連疾病都可以怨自己無好好調理身體，可以怨醫生、醫院、醫管局；

窮，可以認為係社會嘅錯，可以埋怨大公司的政策；

意外事故，可以埋怨唔小心嘅司機，怨道路嘅設計。

 

我嘅意思係佢哋嘅埋怨可能都好有例據，

不過至少有個矛頭，有人會怪，亦都可以講上一句：『我下次要學習 。』

但係天災唔同，天災唔可以。『學習』亦都冇得『學習』。

呢一點，應該係人類嘅最大考驗。一眨眼，身邊嘅屋企人，全部唔見嗮。

冇任何人做錯任何一件事。

 

係咁嘅情況下，我也冇嘢想講，我冇任何嘢想講。

係嗰訪問入邊，學生們問我：

有冇從呢一件事之中，學習到啲乜嘢？

我本來好想亂講一啲噶，咩都好啦，總之答到佢哋嘅問題喇。

但係，我又忍唔住講到真心話，我話「真係冇」。

佢哋問我有冇學到啲「珍惜」呀之類嘅嘢，以下係我嘅答案：

 

『如果你一直都珍惜身邊嘅人、身邊嘅朋友、屋企人，

你向來非常非常非常之珍惜嘅話，

你係唔會因為一個事故，

然后忽然醒起‘哎呀！係喔！係喔！我要珍惜喔！好彩你提我！’。

如果你一直以來，都認為自己非常非常非常咁幸福，

你係唔會從事故之中，

突然覺得‘哎呀！係喔！係喔！係喔！原來我幸福喔！’。』

 

學生們聽到呢一個答案之后，放心嗮，亦都開始笑。

而家唸返起，究竟呢個問題，我答咗啲乜喇？其實我乜嘢都冇答過。

因為，我真係唔識，由呢個『慘境』之中，

表現自己好有觀點呀，有新鮮嘅角度呀、有獨特嘅立場呀……

對唔住！我真係冇任何嘢想講。